Эрдэнийн эрих ᠭᠠᠯᠲᠩ᠂ ᠡᠷᠳᠡᠨᠢ ᠵᠢᠨ ᠡᠷᠢᠬᠡ

Галдан туслагчийн "Эрдэнийн эрих"-ийг анхлан судалж, эрдэм шинжилгээний эргэлтэд оруулсан хүн бол Оросын Монголч эрдэмтэн А.М. Позднеев юм. Тэр бээр "Эрдэнийн эрих хэмээх түүх болой" сурвалжийг судалж, 1636-1737 он хүртэлх 100 орчим жилийн хоорондох Халх Монголын түүхэнд холбогдох хэсгийг орос хэлнээ орчуулан удиртгал, тайлбар, худам монгол бичгийн сийрүүлгийн хамтаар 1883 онд нийтэлжээ. Тэр бээр Галданы "Эрдэнийн эрих"-ийн 41-46 хүртэлх гарчиг (зүйл)-ийг сонгон авч судалгаандаа хамруулжээ. Энэ нь хожмоо А.М. Позднеевын "Эрдэнийн эрих" хэмээн алдаршсан байна.